O Chicle: "Aquí hai xente que mentiu". O fiscal: "O modus operandi é de libro"

José Enrique Abuín Gey, alias 'O Chicle', alegou este xoves, ao final do proceso contra el pola suposta agresión sexual á súa cuñada en 2005, que "se pode demostrar que aquí hai xente que mentiu", algo que dixo en referencia á vítima, testemuñas e aos axentes da Garda Civil.

A sección segunda da Audiencia Provincial da Coruña acolleu a última sesión do proceso por esa suposta agresión sexual o 17 de xaneiro de 2005, unha cuestión que el negou, mentres que a vítima, a súa cuñada Vanessa, que entón era menor de idade, mantivo a súa versión.

No seu dereito á última palabra, o acusado pediu "aclarar un par de cousas" antes de finalizar o xuízo, que quedou visto para sentenza.

"Pódese demostrar que aquí hai xente que mentiu só con mirar certas redes sociais que están abertas, miñas, onde hai imaxes de festas, que ela (a vítima) envíanos mensaxes para citarnos a aniversarios dela, ao seu piso...", dixo.

Ademais, engadiu que "a Garda Civil tamén mente", pois manifestou que "se pode demostrar" que "en 2005 non tiñan ningunha relación co clan dos Panchos" senón que a mantiña en 1994.

Sobre o rápido que ía no seu vehículo aquel día, cando unha testemuña di que o viu, defendeu que "o coche ese era un coche de 100 cabalos, o coche aínda existe, que proben o coche".

A defensa ve o caso influído polo de Diana Quer

Nos informes, a defensa pediu a libre absolución e asegurou que esta causa reabriuse "por referencia ao caso Diana Quer" con "probas totalmente novas", polo que se pregunta "onde queda a presunción de inocencia" ante un "relato que non queda claro" e que é "dunha palabra contra outra".

"As mesmas testemuñas que en 2005 dixeron unha cousa, agora non, din que tiñan presións, que son veciños e que naquel momento mentiron", detallou o avogado de Abuín, e chamou a atención sobre un novo "informe pericial psicolóxico que desacredita ao de 2005".

Entende que a vítima modificou a súa versión por mor do caso Diana Quer, relato que non ve coherente, e que as probas non encaixan co ocorrido, pois cre que o coitelo que supostamente lle puxo o procesado no torso deberíalle deixar algunha marca e di que non ten sentido que, se segundo ela non lle quitou o móbil ata chegar ao lugar dos feitos, non alertase ao longo do camiño.

"Modus operandi de libro"

Pola súa parte, o fiscal cualificou de "modus operandi de libro" a forma en que se produciu, segundo expuxo na lectura das súas conclusións. "O deseño da denuncia é imposible, a denuncia é verdadeira e a violación ocorreu", afirmou.

"Son 17 anos esperando xustiza", dixo pola súa parte o avogado da acusación particular.

"Preparación, execución e encubrimento", resumiu. "Como o caso de Diana Quer", engadiu. Tanto a acusación particular como o Ministerio Público empregaron os mesmos termos para definir a actuación do Chicle.

O fiscal rexeitou o argumento de Abuín de que esa mañá non estivo coa súa cuñada e que se dirixiu a unha entidade financeira porque non tiña diñeiro.

Ambas as partes rexeitaron "invención algunha" por parte da vítima e remitíronse, entre outras cuestións, ao feito de que esta relatase unha chamada a un compañeiro de traballo por parte de Abuín avisando de que chegaría tarde.  

Para a acusación particular, o acusado utilizou o "pretexto de que tiña que saldar unha débeda co seu pai", o da denunciante, para achegarse ao domicilio desta e para convencela de que subise ao coche e cometer, relatou, os feitos, o 17 de xaneiro de 2005, e antes de ir ao instituto.

De "válido, coherente e persistente" cualificou o fiscal o testemuño da vítima. "Intimidouna cun coitelo", expuxo para aludir tamén ao feito de que se producise, segundo o relato da ela, "nun lugar illado".  

Visto para sentenza

A Fiscalía mantivo a súa petición de quince anos de cárcere por un suposto delito de agresión sexual. A acusación particular coincide co Ministerio Público e eleva a petición de indemnización a 50.000 euros porque, segundo dixo, a vítima aínda ten consecuencias psicolóxicas logo do tempo transcorrido.

O caso quedou visto para sentenza. De ser condenado, José Enrique Abuín, sumaría unha nova condena á de prisión permanente revisable polo asasinato de Diana Quer, e aos cinco anos de cárcere polo rapto e tentativa de agresión sexual a unha moza en Boiro en 2017.