A forense que avaliou o acusado do crime do Birloque: "Non se observan dependencias"

Este xoves estaba previsto que rematara o xuízo polo crime da panadeira do Birloque, pero as declaracións dos forenses estendéronse e o acusado terá que esperar ao luns para exercer o seu dereito á última palabra, antes de que o xurado se retire a deliberar.

As declaracións dos forenses foron longas e pormenorizadas, sobre todo, no referido á saúde mental do acusado, que é unha das claves do xuízo.

A defensa quere probar unha dependencia das drogas e do alcol pero a forense que avaliou o arrestado foi moi clara: "Non se observou tal dependencia".

A médica, especializada en psiquiatría e en violencia de xénero, tamén se referiu ao feito de que supostamente esa noite collera o coitelo para suicidarse, e relacionouno con situacións anteriores nas que o detido tamén se autolesionou, tras discutir coas súas parellas.