A Garda Civil difunde os retratos robot dos supostos violadores do Porriño

A Garda Civil de Pontevedra difundiu este xoves os retratos robot dos supostos autores dunha agresión sexual a unha moza de 19 anos ocorrida na madrugada do día 18 de xullo durante as Festas de San Campio, na parroquia de Pontellas, na localidade pontevedresa do Porriño.

O instituto armado, que xa solicitou colaboración cidadá o pasado 21 de xullo, asegurou entón que buscaba dous mozos duns 20 anos de idade, con acento galego, ambos de pelo moreno, que levaban camisetas de manga curta e pantalón curto no momento da suposta agresión.

A Garda Civil ten constancia de que estas dúas persoas se atopaban nas escaleiras do Campo da Festa entre as 3:00 e as 4:00 horas da madrugada durante a actuación da Orquestra Panorama e solicitou entón aos asistentes ao evento que achegasen vídeos ou fotografías feitas nas escaleiras, ou en calquera outro lugar do recinto da festa, se se considera de interese para a investigación.

Agora, coa difusión de dous retratos robot, dá un paso máis e solicita que calquera persoa que poida achegar algún tipo de información ou dato que axude á súa identificación se poña en contacto coa Garda Civil a través do teléfono habilitado para este fin: 600 461 444.

Tamén se poderá achegar información de forma presencial en calquera posto da Garda Civil. Os investigadores garanten que se respectará o anonimato dos informantes.