Investigan o incendio nunha casa deshabitada en Cabana de Bergantiños

Os donos comprobaban na tarde deste venres os danos na súa vivenda, situada no lugar do Penedo da parroquia de Cesullas, en Cabana de Bergantiños. O lume comezou de madrugada afectando sobre todo ao tellado e o baixo cuberta. Foron os veciños quen deron a voz de alarma tras escoitar un forte estourido e tamén os berros dunha persoa pedindo auxilio á que, din, non puideron ver porque en cuestións de minutos xa fuxira do lugar. 

Ata o lugar desprazáronse efectivos do Grupo de Emerxencias de Ponteceso e dos bombeiros de Carballo que lograron sufocar as lapas. Nas proximidades do lugar, os servizos sanitarios do 061 tiveron que atender a unha muller que foi trasladada ao Complexo Hospitalario Universitario da Coruña con queimaduras no 80% do seu corpo.

Durante os labores de extinción os equipos de urxencias, segundo informou o 112, confirmaron que na vivenda había un forte cheiro a combustible. Este feito xunto a que a vivenda estaba deshabitada, xa que os seus propietarios aínda estaban a amañala, levou á Garda Civil a abrir unha investigación para tratar de esclarecer as causas do lume así como a posible relación da muller ferida coa casa que ardeu.

Os actuais propietarios adquiriron a casa recentemente nunha poxa froito do embargo aos anteriores donos.