A India expulsa un diplomático do Canadá tras as acusacións de asasinato dun líder sikh
A India expulsa un diplomático do Canadá tras as acusacións de asasinato dun líder sikh
O primeiro ministro do Canadá Justin Trudeau afirmou que a India estivo implicada no asasinato e expulsou un diplomático indio
O asasinato de Hardeep Singh Nijjar o pasado xuño na localidade de Surrey, no oeste do Canadá, desatou unha crise diplomática entre ambos os países
![](https://img-g24-crtvg.flumotion.com/prog24/2023/20230919/20230919CriseIndiaCanada.png)
A India anunciou este martes a expulsión dun alto cargo diplomático do Canadá, en resposta á acusación das autoridades canadenses de que o país asiático estivo implicado no asasinato no seu territorio dun dos seus cidadáns, un líder separatista de orixe india e pertencente á comunidade sikh.
"O Alto Comisionado do Canadá na India foi convocado hoxe e informado sobre a decisión do Goberno da India de expulsar un alto cargo diplomático canadense", dixo o Ministerio de Exteriores do país asiático nun comunicado.
O diplomático deberá abandonar a India nos próximos días, nunha medida que reflicte "a crecente preocupación sobre a interferencia de diplomáticos canadenses nos nosos asuntos internos", segundo Exteriores.
![Embaixada do Canadá na India. AFP](https://img-g24-crtvg.flumotion.com/prog24/2023/20230919/20230919Embaixadacanadense.png)
O asasinato de Hardeep Singh Nijjar o pasado xuño na localidade de Surrey, no oeste do Canadá, desatou unha crise diplomática entre ambos os países.
Uns descoñecidos dispararon a Nijjar no aparcadoiro dun templo sikh; fora acusado de terrorismo polas autoridades indias por defender a creación do estado independente de Khalistán para a minoría sikh no estado indio de Punxab.
Este movemento separatista pasou a unha insurxencia armada na década dos 80 que deixou decenas de miles de mortos ao seu paso.
O primeiro ministro do Canadá Justin Trudeau afirmou onte que, segundo os servizos de intelixencia canadenses, a India estivo implicada no asasinato de Nijjar. Canadá expulsou ademais onte un diplomático indio, o responsable da intelixencia da nación asiática no país.
Pola súa banda, o Goberno do primeiro ministro indio Narendra Modi rexeitou onte unhas acusacións que cualificou de absurdas e motivadas.
Segundo o Ministerio de Exteriores indio, as declaracións de Trudeau buscan "desviar a atención de terroristas e extremistas khalistanís".
![Encontro de Justin Trudeau con Narendra Modi no cumio do G20](https://img-g24-crtvg.flumotion.com/prog24/2023/20230919/20230919CumioG20.png)
Nova Delhi acusou repetidamente o Canadá de permitir a presenza de persoas que ameazan a súa "integridade territorial", mentres que Trudeau defendeu o dereito á liberdade de expresión e de manifestación pacífica tras un tenso encontro con Modi durante o cumio do G20 o pasado 9 e 10 de setembro.
Tras o encontro de ambos os líderes, O Canadá pospuxo esta semana a súa misión comercial á India despois da paralización de negociacións para un tratado de libre comercio.
O Canadá conta con 1,8 millóns de persoas de orixe india, das que unhas 770.000 son sikh.