Desartellada unha organización criminal que asasinou un home en Cataluña
Desartellada unha organización criminal que asasinou un home en Cataluña
Hai catorce detidos, entre eles, o líder da organización criminal
A rede, ao parecer, dedícase ao narcotráfico e está relacionada co cártel mexicano de Sinaloa
A vítima, un home de 46 anos, apareceu morta nun monte de Tarragona
Os Mossos d'Esquadra e a Policía Nacional acaban de desartellar unha perigosa organización criminal vinculada ao cártel mexicano de Sinaloa polo presunto secuestro e asasinato dun home en Cataluña. Hai catorce detidos, a maioría de nacionalidade mexicana.
Segundo a investigación, a familia da vítima denunciou en xuño que secuestraran o home en Barcelona e que pedían un rescate de 240.000 euros. No mes de agosto, o corpo do varón apareceu nunha zona boscosa de Tarragona con indicios de violencia.
Supostamente, a vítima, de 46 anos, traballaba para a organización e viaxara dende Italia para xuntarse cos líderes da rede criminal.
Na operación rexistráronse varios inmobles na cidade condal e localizouse un laboratorio de metanfetaminas. Ademais, incautáronse de armas de fogo, cartos e material tecnolóxico. Entre os detidos figura o presunto líder da organización criminal.
