A luz alcanza este domingo o seu segundo prezo máis alto da historia
A luz alcanza este domingo o seu segundo prezo máis alto da historia
O prezo máximo da xornada rexistrarase entre as 20:00 e as 22:00 horas
![](https://img-g24-crtvg.flumotion.com/prog24/2022/20220306/RAMOS_PREZOS_ELECTRICIDADE_frame_2728.png)
O prezo da electricidade no mercado almacenista subiu este domingo máis dun 3 % ata alcanzar os 379,03 euros o megawatt hora (MWh), o seu segundo prezo máis alto da historia, en plena invasión rusa de Ucraína.
O importe é un 48 % superior ao do domingo anterior, multiplica por máis de oito o que marcou hai xusto un ano (45,07 euros), e sitúase un 84 % por riba do rexistrado o 24 de febreiro, cando comezou o conflito.
Ademais, é o máis caro da historia para un domingo, día no que habitualmente diminúe a actividade económica e a demanda enerxética é menor, e sitúase só por detrás dos 383,67 euros/MWh rexistrados o 23 de decembro.
Por franxas horarias, o prezo máximo para este domingo rexistrarase entre as 20:00 e as 22:00 horas (470,01 euros/MWh) e o mínimo, de 334,21 euros/MWh pagouse de madrugada entre as 3:00 e as 4:00 da mañá.
Nos seis primeiros días de marzo o prezo da electricidade sitúase de media nos 323,42 euros/MWh, un 35 % máis elevado que o valor de decembro, o mes máis caro da historia (239,22 euros/ MWh), e case o triplo (un 190 % máis) que o prezo medio de 2021 (111,4 euros/ MWh), o máis alto desde que hai rexistros.