A OCDE di que a economía española é a única da eurozona que crecerá máis do previsto: un 2,6 %

A OCDE revisou á alza as previsións de crecemento da economía española para 2025 e 2026, e é con Turquía o único dos grandes países membros para o que o fixo, mentres a tendencia é claramente a inversa polo efecto da guerra comercial desencadeada por Donald Trump.

No seu informe interino de perspectivas publicado este luns, a Organización para a Cooperación e o Desenvolvemento Económico (OCDE) espera que, despois de que ese crecemento fose do 3,2 % en 2024, o máis alto dese grupo, só igualado por Turquía, será do 2,6 % en 2025, tres décimas máis do que anticipaba en decembro.

Para 2026, a corrección en positivo é mínima (dunha décima respecto a hai tres meses), pero en calquera caso España superará nun punto porcentual a cifra da zona euro no seu conxunto, e tamén estará por encima da do resto de grandes países desenvolvidos fóra de Turquía.

As proxeccións da OCDE para este ano e o próximo son case coincidentes coas que anunciou en febreiro o Goberno (2,6 % e 2,2 %, respectivamente) e reflicten unha mellora das expectativas nos últimos meses, por exemplo, se se comparan co 2,3 % e o 2,1 % que calculaba en novembro a Comisión Europea, nos que o contexto global claramente se deteriorou.

As claves

Aínda que os autores do informe non entran nunha análise detallada do país, si que debullan algunhas pistas que poden dar un comezo de explicación.

De entrada, sinalan que en termos de comparacións históricas, a taxa de paro se se compara co período 2018-2019 é particularmente baixa, igual que noutros países do sur de Europa, como Italia.

A inflación non vai reducirse tanto como esperaban en decembro, xa que agora cren que será do 2,5 % en 2025 (catro décimas máis do anticipado entón) e do 2,1 % en 2026 (unha décima máis), pero en calquera caso será inferior ao 2,9 % de 2024 e achégase ao obxectivo de arredor do 2 % do Banco Central Europeo (BCE).

Ademais, se o que se examina é a inflación subxacente (a que exclúe os elementos máis volátiles, que son a enerxía e os alimentos), a rebaixa é aínda máis significativa, xa que pasará do 2,8 % en 2024 ao 2,2 % en 2025 e ao 1,9 % en 2026. É dicir, inferior á media da eurozona eses dous anos.

Doutra banda, a finais de 2024 España era un dos países do G20 nos que os salarios reais (descontando o efecto da inflación) estaban por encima do nivel previo á pandemia de coronavirus, cinco anos antes.

É dicir, que o poder adquisitivo dos asalariados mellorara nese tempo (ao redor do 3 %), un pouco menos que no Brasil ou nos Estados Unidos, pero máis que no Reino Unido, Canadá ou Australia, mentres que no Xapón, Francia ou Italia aínda non se recuperaron.