A OPEP+ decide baixar a súa oferta petroleira en 2 millóns de barrís diarios
A OPEP+ decide baixar a súa oferta petroleira en 2 millóns de barrís diarios
É o maior recorte realizado polo organismo dende maio do 2020, ao comezo da pandemia
![](https://img-g24-crtvg.flumotion.com/prog24/2022/20220603/colOPEPAUMENTAPETROLEO_frame_195.png)
A alianza OPEP+, liderada por Arabia Saudita e Rusia, decidiu este mércores en Viena reducir o seu bombeo en 2 millóns de barrís diarios (mbd), o que supón o maior recorte da oferta petroleira desde maio de 2020.
Así o anunciou á prensa o viceministro de petróleo de Irán, Amir Hossein Zamaninia, ao remate dunha conferencia ministerial da Organización de Países Exportadores de Petróleo (OPEP) e as súas dez nacións produtoras aliadas, entre elas Rusia, México e Casaquistán.
Ademais, os ministros participantes acordaron estender un ano máis a súa cooperación, co cal a citada alianza, forxada en 2016 para facer fronte á caída dos "petroprecios" causada polo auxe de xisto en EEUU, manterase polo menos ata fins de 2023.
Na súa declaración final, os ministros explican que acordaron "axustar á baixa a produción global en 2 mbd (...) a partir de novembro de 2022".
O maior recorte dende maio do 2020
O recorte de produción pactado hoxe é o máis voluminoso desde o de case 10 mbd que o grupo puxo en marcha en maio de 2020 para compensar a caída da demanda enerxética desencadeada pola crise do coronavirus.
É preto do dobre do que se esperaba ata onte, martes, nos mercados internacionais, xa que varios delegados filtraran á prensa que negociaban unha redución de algo máis dun millón de barrís diarios, o cal xa impulsou unha considerable alza nos prezos do cru.
Con todo, é de esperar que a redución real sexa menor que a oficial, xa que as extraccións da maioría dos produtores do grupo levan meses quedando moi por baixo da cota nacional establecida a pesar de que bombean ao máximo da súa capacidade técnica.
Aínda cando o recorte real vaia ser ao final menor que o anunciado, a medida adoptada hoxe supón un claro "non" ás nacións occidentais que veñen desde hai tempo pedindo á OPEP que abra as billas para abaratar os combustibles e a enerxía, e frear así a inflación.