A oposición dá por esgotada a lexislatura tras escoitar a Alfonso Rueda

A portavoz nacional do BNG, Ana Pontón, afirmou este luns que a primeira intervención do presidente galego, Alfonso Rueda, no debate de estado da autonomía en Galicia confirma o "epílogo" do goberno do PPdeG e considérao un "insulto" aos galegos.

Na súa primeira avaliación do discurso de Rueda, a líder do BNG recriminoulle ao PPdeG que, tras catorce anos no Goberno galego, agora o mandatario da Xunta acuda cun "recital" de anuncios, "anuncios, promesas, e propaganda".

Segundo Pontón, parece que agora, coas eleccións autonómicas próximas a ser convocadas, os dirixentes do PPdeG "quérennos convencer de que van facer agora o que foron incapaces de facer en catorce anos".

Pontón puxo en dúbida as promesas de Rueda en materia social e de servizos públicos xa que, ao seu entender, son un "insulto á intelixencia e falta de respecto aos galegos" que despois de máis dunha década de recortes agora prometa melloras neste sentido.

Por todo iso, a líder do BNG concluíu que Rueda "deixa en evidencia ata que punto estamos nas últimas rabexadas do PP" en Galicia.

O portavoz do PSdeG, Luis Álvarez, sinalou que o presidente da Xunta "equivocouse en todos os ámbitos" durante o seu discurso no debate sobre o estado da autonomía, debido a que debuxou un escenario de Galicia "propio dunha torre de marfil".

Segundo o socialista, Rueda fixo un discurso "máis propio doutro escenario", en referencia ao Congreso dos Deputados, e acusou ao presidente da Xunta de utilizar a súa intervención para facer "o seu primeiro acto de campaña".

"O señor Rueda equivocouse en todos os ámbitos. Na diagnose e nas medidas que propón, no escenario e no discurso", declarou.

Afirmou ademais que o titular da Xunta ten unha "visión nesgada" da comunidade autónoma e que as súas "receitas" non serven para resolver os problemas de Galicia.

Tamén se mostrou convencido de que este será "o último" e "o único" debate sobre o estado da autonomía en que participe Rueda, xa que lle augurou pouco futuro como presidente do Goberno galego.

Desde as filas do PPdeG, o seu voceiro, Alberto Pazos, cre que "ninguén que escoitar a Rueda pode negar que Galicia ten proxecto, folla de ruta e liderado claro".

En declaracións aos medios tras concluír o discurso do titular do Executivo galego, o portavoz popular felicitou a Rueda pola súa intervención. "Creo que fixo o discurso que os galegos esperan do seu presidente", sinalou.

Segundo Pazos Couñago, o presidente da Xunta fixo unha análise "realista" e tamén "ofreceu un proxecto de futuro centrado nas necesidades reais dos galegos".

Valorou positivamente as súas reivindicacións en temas que "dependen doutras administracións", como a transferencia da AP-9, a construción dos viadutos da A-6 ou os fondos europeos, así como "tantas outras cuestións que seguen esperando os galegos".

Sobre os anuncios, "a parte máis ilusionante da intervención", Alberto Pazos destacou a rebaixa do 1 % do imposto de transmisións ou as medidas en materia de atracción de investimentos, ademais do bono de 5.000 euros anuais para coidado de dependentes.

Así mesmo, o portavoz popular afirmou que lle "sorprenden" as "críticas", xa que, na súa opinión, non se pode negar que "se fixeron apostas importantes de cara ao futuro".