A poboación galega envellece: a idade media alcanza os 48 anos e supera os 50 en Ourense e Lugo

O declive demográfico agrávase cada ano que pasa en Galicia. A nosa é a segunda comunidade máis envellecida de España, só por detrás de Asturias.

Os datos de idade media que publicou este venres o Instituto Galego de Estatística (IGE) amosan a situación actual. Dos 45,34 anos ao 1 de xaneiro de 2012 pasou aos 48,01 en 2022.

A taxa galega de envellecemento está en máximos históricos e as previsións para a vindeira década non son moi esperanzadoras; haberá 2,5 xubilados por cada menor de 20 anos.

Mentres, por provincias, Ourense alcanza os 51,19 anos de idade media e Lugo os 50,35, fronte aos 47,72 da Coruña e 46,52 de Pontevedra.

Na estrutura por idades da poboación galega "compróbase o proceso de envellecemento", segundo o IGE: diminúe o peso dos grupos de individuos de menos de 20 anos e de entre 20 e 64 e increméntase o de 65 ou máis anos.

Para a análise "máis específica" do proceso de avellentamento úsase o índice de envellecemento, que calcula o número de persoas de 65 ou máis anos por cada 100 persoas menores de 20, segundo explica.

A velocidade do proceso

Desde o ano 1975, o seu "continuo" aumento reflicte "a velocidade do envellecemento" da poboación de Galicia, superior, advirte, no caso das mulleres.

Así, para o conxunto de Galicia situouse en 2022 en 167,26 e isto significa que por cada 100 menores de 20 anos contabilizáronse máis de 167 persoas maiores de 64.

Outro indicador, o índice de "sobreenvellecemento", mostra como está estruturado o grupo de 65 ou máis: calcula que porcentaxe representa a poboación de 85 ou máis anos sobre o grupo de 65 ou máis. En 2022, no conxunto de Galicia sitúase no 19,97%.

A dependencia

Unha das preocupacións que aparecen por mor do envellecemento dunha poboación" é como se incrementa a denominada poboación en idade "potencialmente dependente", que engloba a poboación menor de 15 anos e a de máis de 64, con respecto á poboación en idade "potencialmente activa", que inclúe a poboación de entre 15 e 64 anos. Así o constata Estatística.

O IGE calcula tres indicadores para estudar estas proporcións, o primeiro deles o índice de dependencia global, que relaciona a poboación menor de 15 anos e a de 65 ou máis coa poboación de entre 15 e 64 anos. "Desde o ano 1975 obsérvase unha lixeira diminución ata 2008, data na que o indicador comeza a incrementarse", sinala.

O índice de dependencia xuvenil relaciona a poboación menor de 15 anos coa poboación entre 15 e 64. "Este indicador non presenta na actualidade en Galicia grandes diferenzas entre sexos", segundo apunta.

Por último, o índice de dependencia senil, que relaciona a poboación de 65 ou máis anos coa poboación entre 15 e 64 e que se caracteriza pola diferenza que existe no seu valor entre ambos os sexos e, ademais, polo seu "incremento continuado".

A descendencia

O IGE recolle, xa con datos de 2021, un índice sintético de fecundidade ou número medio de fillos por muller de 1,01. A idade media da maternidade situouse nos 33,19 anos e a da paternidade, por encima, ao chegar aos 35,72 anos.

Resalta que a idade media da nai ao nacemento do primeiro fillo, despois duns anos de "certo estancamento", volve aumentar en 2021.

Muler maior na cama