A princesa Leonor é xa alumna da Escola Naval de Marín

A princesa de Asturias, Leonor de Borbón e Ortiz, incorporouse "con grande ilusión" como gardamariña de primeiro na Escola Naval de Marín onde continuará a súa formación militar.

Sobre as 19:00 horas deste xoves a filla maior dos reis de España foi recibida, en calidade de princesa de Asturias, na Dirección polo comandante director da Escola, Pedro Cardona Suanzes.

Tras saudar á prensa cun "boas tardes", vestida co traxe de gardamariña de primeiro -todo branco e con luvas-, asinou no libro de honra da Escola.

A princesa Leonor asina no libro de honra da Escola Naval de Marín para incorporarse ao curso 2024-2025.(EFE/ Francisco Gómez/Casa)

"Hoxe incorpórome, con grande ilusión, a esta Escola Naval Militar para continuar coa miña formación castrense. Estou segura de que aquí terei a oportunidade de aprender moito e compartir moitas experiencias importantes xunto aos meus compañeiros de promoción. Con afecto, princesa de Asturias", deixou escrito a princesa de Asturias.

A continuación, reuniuse co tenente de navío comandante de brigada, Erik Hellman Muñoz, que será o seu xefe directo como alumna durante este curso 2024-2025.

Leonor cambiou de uniforme e puxo o de traballo -camisa branca e pantalón azul mariño- e realizou un paseo por varias estancias da escola. Desta forma, viu unha das lanchas de instrución, que é nas que fan prácticas.

Esta vez, a diferenza de cando ingresou en Zaragoza, Leonor chegou soa, sen a presenza dos seus pais nin da súa irmá. Pola súa banda, Filipe VI atópase en Barcelona con motivo da Copa América, a raíña Letizia viaxará durante esta xornada a París e a infanta Sofía está de volta en Gales, O Reino Unido, para cursar o seu segundo ano de bacharelato internacional.

Así será o seu día a día

O día a día da princesa de Asturias volverá ser moi parecido ao que viviu na Academia Xeral Militar, en Zaragoza.

Terá que levantarse todo os días ás 06:45 horas e ás 07:50 horas toca pasar 'revista de policía' (verifican que leven o uniforme ben posto).

A continuación, irá a clase: cinco horas pola mañá e tres pola tarde.

Dispón dunha hora para comer e todos os días debe de realizar unha hora de ximnasia.

Ás 18:00 horas ten lugar un acto militar, a 'lectura da orde', e ás 22:30 horas ten que ir durmir.

As fins de semana levantarase ás 08:45 horas, a mañá do sábado é lectiva e a partir das 11:30 horas pode saír á rúa. Os alumnos, en función da súa antigüidade e do curso en que estean encadrados poderán regresar á escola á 01:30 horas, os alumnos de primeiro, ou ás 3:00 horas.

Con todo, a partir do terceiro curso os estudantes teñen a posibilidade de durmir fóra.

Trinta e oito anos despois do ingreso de seu pai na Escola Naval, a princesa prosegue os seus estudos castrenses, que rematarán dentro de dous anos tras o seu paso tamén polo Exército do aire e do espazo.

"A formación militar é esencial porque leva consigo valores: compromiso, lealdade, solidariedade cos cidadáns e liderado, que é moi importante para quen vai ser a futura xefa do Estado", declarou a Ministra de Defensa, Margarita Robles, nunha visita ás instalacións na ENM horas antes da recepción da Princesa.

A futura raíña durmirá nunha liteira, nun cuarto con outras tres gardamariñas. Tamén no comedor, Leonor, chamada a ser xefa das Forzas Armadas, vai ser unha máis. Aínda que o cuartel de alumnos incorporou por razóns de intimidade e seguridade algunhas reformas. 
O ferrolán Pedro Cardona Suanzes, director da escola, seguirá de preto a formación da xa alférez Borbón Ortiz. 

O adestramento físico dun gardamariña inclúe remo, vela, agatuñar polo mastro do patio, atletismo, natación... e moita teoría. Oito horas de clase diarias, en que se incorporan prácticas coas últimas tecnoloxías, como a realidade aumentada.

A navegación en plena tempestade ou a orientación polas estrelas forman parte dun réxime de instrución que na propia Escola Naval de Marín consideran moi esixente e que rematará o vindeiro xullo, tras case cinco meses de cruceiro de instrución a bordo do Juan Sebastián de Elcano.