A princesa Leonor participa nunha ofrenda á Virxe do Pilar na véspera da súa xura de bandeira

A princesa de Asturias debutará nun acto militar público esta tarde, nunha cerimonia relixiosa voluntaria que realizan os cabaleiros e damas cadetes de primeiro ano da Academia Militar de Zaragoza. Xunto cos seus 400 compañeiros de promoción, Leonor formará na praza da catedral antes de desfilar ante a Virxe do Pilar, que loce un manto militar para este acto.

Esta ofrenda para pedir a protección da patroa da cidade é o prólogo do grande acto de mañá. A xura de bandeira ponlle fin ao período inicial de formación, tras levar a cabo as primeiras manobras militares e tras cumprir dous meses de instrución.

A xura de bandeira comezará ás doce no patio central da Academia Militar de Zaragoza. Estará presidida polos reis e contará cuns 2.500 asistentes, que verán desfilar os soldados vestidos co uniforme de gala do Exército de Terra. A cadete Borbón Ortiz será a primeira en xurar bandeira, pero non terá o protagonismo que tivo o seu pai na súa cerimonia. O 11 de outubro de 1985, o daquela príncipe de Asturias prestou xuramento en solitario, ante os seu pais e as principais autoridades do Estado. Mañá, Filipe VI será o encargado de pechar o acto castrense cun discurso.

A axenda da princesa Leonor afronta un mes de outubro marcado por varios eventos sinalados. Tras a xura de bandeira, asistirá a próxima semana ao desfile militar do día da festa nacional. O día 19 viaxará a Oviedo para entregar os premios que levan o seu nome, e o día 31 a herdeira da coroa xurará a Constitución ante as Cortes, o mesmo día en que alcanza a maioría de idade.