A raíña Letizia preside a entrega de medallas da Cruz Vermella
A raíña Letizia preside a entrega de medallas da Cruz Vermella
Oviedo acolle o acto conmemorativo do Día Mundial da Cruz Vermella e da Media Lúa Vermella
A cerimonia estivo marcada polo aniversario da entidade, este ano fai 160 anos
O auditorio Príncipe Felipe de Oviedo foi o escenario da entrega das medallas de ouro polo Día Mundial da Cruz Vermella e da Media Lúa Vermella. Unha cerimonia que estivo presidida pola raíña Letizia, que destacou o labor humanitario da entidade.
"Pase o que pase, catástrofes, guerras, exclusión, desigualdade, falta de oportunidades, pobreza, sempre encontraremos unha man tendida na Cruz Vermella".
A celebración estivo marcada polo aniversario da Cruz Vermella Española, que este ano cumpre 160 anos. A súa historia foi o fío condutor da cerimonia.
"160 anos de humanidade, é o lema co que celebramos este ano o día mundial da Cruz Vermella e da Media Lúa Vermella. Ese principio de humanidade que nos impulsa a previr e aliviar o sufrimento humano", di a presidenta da Cruz Vermella, María del Mar Pageo.
Precisamente polo seu perfil humanitario nas súas profesións e campos de traballo foron seleccionados os galardoados deste ano.
"Parabéns a todos, que a Cruz Vermella vos dera este recoñecemento significa que o voso traballo ten propósito, é útil, transformador", dixo a raíña Letizia.
Recibiron a medalla de ouro organizacións coma a Axencia Servimedia, o centro San Camilo, a Fundación Neurodereitos e a Federación Española de Enfermidades Raras. Tamén personalidades como o cineasta Fernando León de Aranoa ou o científico Fernando Valladares.
