Luz verde á tramitación da reforma do delito de sedición

A proposta do PSOE e Unidas Podemos para suprimir o delito de sedición abrirá paso definitivamente no Congreso, que esta noite apoiou tramitar a iniciativa despois dun agre debate repleto de críticas ao Executivo por parte da oposición, que a considera un pago ao independentismo.

Ao fío da 1 da madrugada, tras unha maratoniana xornada parlamentaria en que o Goberno conseguiu sacar adiante os Orzamentos Xerais de 2023, a Cámara Baixa apoiou a toma en consideración da iniciativa, con 187 votos a favor, 155 en contra e seis abstencións que os deputados foron anunciando un a un e a viva voz.

Iso si, coa advertencia dalgúns grupos minoritarios de que presentarán emendas ao considerar que o novo delito de "desordes públicas agravadas" pode criminalizar as protestas e mobilizacións.

A reforma proposta avoga por borrar o delito de sedición do Código Penal e convertelo en "desordes públicas agravadas", cunha rebaixa de quince a cinco anos da pena máxima de prisión e ata oito anos de inhabilitación.

A iniciativa volveu concentrar as críticas da dereita do arco parlamentario, que ve nela unha cesión ao independentismo catalán a cambio do apoio aos Orzamentos, algo que negou o portavoz de ERC Gabriel Rufián.

O debate, que se prolongou durante máis de dúas horas, produciuse en ausencia do Goberno, o cal foi obxecto de reproches, e só a metade puido ver na bancada do Executivo á súa vicepresidenta segunda Yolanda Díaz, aínda que no momento da votación se foron incorporando algúns ministros.

O PSOE, por boca de Francisco Aranda, e Unidas Podemos, da man de Jaume Asens, defenderon a necesidade de suprimir o delito de sedición para adaptar o Código Penal aos "estándares europeos", e reivindicaron a aposta polo diálogo e a convivencia do Goberno en Cataluña fronte á falta de propostas do PP na comunidade autónoma.

Esperábanse duras críticas do PP e así sucedeu. A súa voceira parlamentaria Cuca Gamarra reprochou ao Goberno a "tramposa e fraudulenta" proposta de reforma, feita "ao ditado de (Oriol) Junqueras e á medida dos golpistas", en alusión aos condenados polo procés.

Porque para Gamarra non se trata de "convivencia senón de conveniencia", en alusión ao apoio de ERC e de EH Bildu aos Orzamentos. "Os seus socios esixen pagos en man", espetou a deputada, quen dixo "hoxe é día de cobranza".

Tamén agresiva foi a intervención do deputado de Vox Javier Ortega-Smith, para quen a proposta só busca "facilitar a volta dos covardes fuxidos", como o expresidente catalán Carles Puigdemont, mentres que a presidenta de Cs Inés Arrimadas acusou o Goberno de facer Códigos Penais a medida dos delincuentes" e de defender "catro señoritos nacionalistas que levan toda a vida vivindo moi ben á conta do procés.

Pero o portavoz de ERC Gabriel Rufián negou que a reforma sexa unha concesión ao seu partido ou ao independentismo e dixo que con ela se pon "un pouco máis difícil ao xuíz ou xuíza facha (...) e se quita o xoguete a xuíces fascistas", unha expresión que lle recriminou a presidenta do Congreso Meritxell Batet.

Rufián dirixiuse a JxCAT, sen nomealos, para instalos a que sexan parte dunha solución e non do problema e a que, como fixo ERC, axuden "desde Madrid" a sacar adiante leis que salvaron a vida a millóns de persoas na pandemia.

Tamén grazas en parte a ERC "nove persoas dormen na súa casa e non nunha cela", concluíu en alusión aos condenados do procés.

En Bildu, Jon Iñarritu viu nesta reforma unha medida "positiva" para "desxudicializar" o conflito político de Cataluña e "sacar dos tribunais o que nunca debeu chegar a eles".

Non gustou, con todo, a proposta á CUP, que se abstivo ao considerar que corre o risco de penalizar o dereito de protesta, en liña doutros partidos como BNG ou PdeCAT.