A romaría do Monte Faro, en Chantada, axunta un ano máis devoción e tradición
A romaría do Monte Faro, en Chantada, axunta un ano máis devoción e tradición
Unha multitude de fregueses acudiron ao Monte Faro para participar na romaría
Moitos devotos recrearon o viacrucis descalzos ou de xeonllos
O día solleiro animou a moitos fregueses a achegarse á tradicional romaría do Monte Faro, onde se xuntan as terras de Chantada e o Deza.
A celebración comezou o sábado coa subida a cargo dos romeiros da imaxe da Virxe dende a igrexa de Requeixo ata o santuario situado no cumio do Faro.
Os devotos recrean o viacrucis subindo os duros camiños a pé, algúns descalzos, e de xeonllos os máis entregados. Todo con tal de cumprir os votos ofrecidos tras superar algunha penalidade.
Durante todo o día celébranse actos litúrxicos para honrar a Virxe do Faro, pero tampouco falla o sentimento popular dos romeiros con xantares e o espírito festivo da xornada.
Este ano o día grande da celebración cae en domingo, polo que se notou o incremento de participantes na romaría, que ano tras ano cumpren coa tradición, realizando o camiño da Virxe, rodeando o templo ou cumprindo unha ofrenda nos lampadarios do recinto.
A romaría continúa este luns, coa volta da talla da Virxe á ermida de Requeixo, onde permanecerá ata o ano que vén.
