A TVG acada o seu mellor dato histórico desde 2008, segundo o EXM

A Televisión de Galicia segue a medrar e segue a ser a canle líder en Galicia, e en todas as franxas de emisión, segundo o Estudo Xeral de Medios (EXM) coñecido este martes, un estudo no que están reflectidos os resultados de todos os grandes grupos de comunicación de España, tanto públicos como privados.

Esta primeira onda do ano do EXM sinala que a TVG lidera cunha cota do 23,2% no conxunto da semana e un 24,5% de luns a venres. Esta de luns a venres é a maior cota de audiencia desde o ano 2008 en Galicia. A audiencia da canle non para de medrar e  creceu respecto á onda inmediatamente anterior case un 30% (28,9%). Con respecto ao mesmo período de hai un ano, a TVG incrementa a súa cota en 2,6 puntos de share, (unha suba porcentual do 12,6%).

A TVG sitúase en Galicia moi por riba do resto de competidores públicos e privados con máis de 8 puntos vantaxe sobre a seguinte canle, e entre os entes autonómicos da rede de FORTA, unha vez máis a TVG é a líder de audiencia, superando á segunda canle autonómica en 5,3 puntos.

A TVG lidera en todas as franxas de emisión do día. Pola mañá de 08:00 a 13:30, cun 27,2% (con picos de audiencia do 47%) supera ao competidor máis próximo, La1, en 14,9 puntos de share. Na franxa de sobremesa (13:30 a 17:00), a que contén o bloque informativo formado polo espazo de proximidade ‘Galicia noticias’ e ‘Telexornal mediodía’, media unha cota do 36,3%, (e con picos do 45%) superando a La1, en 21,6 puntos de share.

Xa pola tarde (17:00 a 20:00), TVG acada unha cota do 21,8% con 6,3 puntos máis que o segundo operador. E na franxa de noite (20:00 a 04:00), a Galega ten unha cota do 17,7%, 2,6 puntos por riba da seguinte canle.

Nesta primeira onda do ano, salientan ademais as cotas de pantalla acadadas os martes (32,1%), luns (27,1%) e mércores (25,5%).