A UE ensaia en Galicia sistemas de rexeneración de montes queimados

Hai dous anos ardía o monte de Quintá de Lor, en Quiroga.

O terreo quedou arrasado e a recuperación é lenta.

O proxecto Life VAIA da Unión Europea permite actuar en cinco hectáreas desta zona para experimentar proxectos cos que a terra que ardeu sexa rendible o máis pronto posible.

Polo de agora plantaron castiñeiros e piñeiros pero queren incorporar outras especies de crecemento máis rápido ou de usos non forestais.

A clave é producir mantendo a biodiversidade.

Proxectos similares ao de Quiroga desenvólvense en Francia, Portugal e Italia.

Científicos deses países colaboran cos galegos para comparar experiencias en canto a rexeneración dos montes queimados.

Instalación de colmeas, sementeira de plantas medicinais, ou aplicación nos solos de palla e de xurros de coello son algunhas das técnicas que se proban.

Hai que rexenerar a terra pero tamén preparala para o cambio climático.

Os proxectos serán aplicables tamén a zonas que sufriron erosión por treboadas ou períodos de seca prolongados.