A UE prohibe importar carbón ruso

A Unión Europea abriu este xoves a porta ao seu quinto paquete de sancións contra Rusia pola invasión de Ucraína, que afecta por primeira vez ao sector enerxético, coa prohibición das importacións de carbón ruso, e inclúe ademais un embargo de armas e o veto ás exportacións de alta tecnoloxía a ese país.

As novas medidas inclúen ademais máis sancións contra "oligarcas, actores de propaganda rusa, membros do aparello de seguridade e militar e entidades do sector industrial e tecnolóxico ligados á agresión rusa contra Ucraína", indicou a presidencia francesa de quenda do Consello da UE en Twitter.

As medidas foron propostas o mércores pola Comisión Europea e adoptadas este xoves polos embaixadores dos Estados membros ante a UE tras dous días debatendo os seus detalles.