A USC estrea a Cátedra Institucional Rosalía de Castro

A Cátedra Institucional Rosalía de Castro botou a andar este venres co obxectivo de profundar no estudo académico e crítico da obra e da figura de Rosalía nas súas múltiples dimensións, buscando reforzar a súa proxección e coñecemento tanto no ámbito galego e peninsular como internacional.

A cátedra inaugurouse este venres cun acto no Salón Nobre do Colexio de Fonseca presidido polo reitor Antonio López, no que tamén se lle concedeu a Insignia de Ouro da USC á profesora emérita da Universidade de Londres Catherine Davies.

A cátedra, xurdida como froito dun convenio co Parlamento de Galicia e a Consellería de Cultura, Lingua e Mocidade, terá como prioridade promover achegas sobre a autora desde perspectivas e paradigmas renovadores, pero sen esquecer a atención a aspectos máis tradicionalmente filolóxicos, como o coñecemento crítico da obra e da figura da escritora en todos os seus aspectos. Tamén servirá para fomentar edicións do conxunto da súa produción, sen descartar posibles textos inéditos.

Inauguración da Cátedra de Rosalía (Xunta de Galicia)

O codirector da cátedra, o profesor da USC Fernando Cabo, sinalou que xa se deron os primeiros pasos coa participación en congresos e seminarios para difundir aínda máis a obra dunha “escritora de primeira magnitude” e de “relevancia cada vez máis innegable”.

Pola súa banda, o secretario xeral de Política Lingüística, Valentín García, sinalou que esta iniciativa supón "un privilexio ao permitir que a día de hoxe se siga estudando e descubrindo a Rosalía, unha muller que logrou ser o referente dunha lingua, a galega, fito que non ocorreu con outro idioma".

Neste sentido, o responsable de Lingua da Xunta destacou o labor investigador arredor da autora que, lembrou, "sempre nos acaba ensinando novas perspectivas e reflexións".

Na cátedra haberá unha potenciación de Rosalía de Castro e da súa obra como elementos dinamizadores das concepcións máis tradicionais referidas á historia literaria, á literatura nacional, aos xéneros literarios e á relación entre escritura e territorio ou entre escritura e identidade de xénero.

Tamén se profundará no estudo da significación de Rosalía desde a perspectiva da memoria pública e promoverase a realización de cartografías e outro tipo de achegas, nas que o territorio da provincia da Coruña terá un protagonismo destacado.

Ademais organizaranse actividades de fomento do desenvolvemento local na xeografía vital da autora, en particular na vila de Padrón e a súa contorna (Dodro, Ames...) e nas cidades de Compostela e A Coruña.

E dinamizaranse iniciativas e facilitaranse colaboracións con entidades relacionadas coa traxectoria, o pensamento e a obra da escritora, así como coas dedicadas a outras figuras canónicas (Pondal, Pardo Bazán ou Curros Enríquez), de modo que o foco abarque a literatura e sociedade do século XIX en toda a súa complexidade.