A Xunta activa xa os avais para facilitar a compra de vivenda

A Xunta de Galicia abre o prazo para solicitar os seus avales para a compra de vivenda este martes, 1 de abril. O programa permanecerá aberto ata o 31 de outubro ou ata que se esgote o orzamento asignado para este ano, que ascende a cinco millóns de euros. O obxectivo é facilitar o acceso á vivenda habitual, reducindo o importe que a persoa compradora debe adiantar como entrada ao contratar unha hipoteca.

O aval da Xunta poderá cubrir ata o 20 % do prezo de adquisición da vivenda. Esta medida supón unha axuda directa ás persoas que non dispoñen do aforro necesario para afrontar ese primeiro pagamento. Ese paso inicial adoita ser un dos principais obstáculos á hora de acceder a unha vivenda en propiedade.

Convenio con entidades bancarias

A conselleira de Vivenda e Planificación de Infraestruturas María Martínez Allegue asinou o luns o convenio de colaboración coas entidades Abanca e Caixa Rural Galega. No acto, participaron o director de Negocio Institucional de Abanca en Galicia José Lino Comesaña e o subdirector xeral de Caixa Rural Galega Gabriel Guijarro Arca. Este acordo define os termos da colaboración entre a Xunta e as entidades financeiras para canalizar a concesión dos avais ao abeiro da convocatoria de 2025.

Destinatarios e condicións

A iniciativa mantén os criterios da convocatoria de 2023, pero introduce unha novidade importante. As persoas menores de 36 anos poderán solicitar o aval para calquera tipo de vivenda, sempre que se trate da súa primeira residencia habitual. Ademais, en 2025 a medida esténdese tamén a persoas de calquera idade, sempre que a vivenda obxecto da compra sexa protexida e se cumpran os requisitos específicos para acceder a este tipo de inmobles.

Para calquera das dúas modalidades, a vivenda debe estar situada en Galicia e destinarse a residencia habitual e permanente da persoa compradora, polo menos durante o tempo de vixencia do aval. Este deixará de ter efecto no momento en que se devolva á entidade financeira a cantidade garantida.

Requisitos económicos e límites de prezo

As persoas solicitantes deberán acreditar ingresos anuais comprendidos entre dúas e cinco veces e media o IPREM, é dicir, entre 16.800 e 46.200 euros. No caso de adquisición por parte de máis dunha persoa, o límite conxunto pode chegar ata 6,5 veces o IPREM, o cal supón un máximo de 54.600 euros anuais.

Establécense tamén límites no prezo máximo de adquisición da vivenda segundo a localización. En concellos como A Coruña, Santiago de Compostela, Vigo, Pontevedra ou Ourense, o importe non pode superar os 260.000 euros. Nos municipios de Lugo, Ferrol ou noutros de tamaño medio ou carácter periurbano, o tope sitúase nos 210.000 euros. No resto do territorio galego, o límite será de 180.000 euros.

O programa de avais da Xunta busca apoiar especialmente a mocidade galega no acceso á súa primeira vivenda. Tamén pretende ampliar as posibilidades de compra para outros colectivos no caso das vivendas protexidas. A medida quere contribuír a fixar poboación e a garantir o dereito a unha vivenda digna en condicións de igualdade en todo o territorio galego.