A Xunta asegura que hai 370 profesores máis este curso a pesar de redución de alumnos

O conselleiro de Educación Román Rodríguez asegurou este mércores que o sistema educativo galego conta para este curso con case 31.000 profesores, despois de que se sumen 370 profesionais máis a pesar da redución do número de alumnos.

O titular de Educación presumiu do “fantástico sistema educativo” con que conta Galicia e do “esforzo” que fai a Xunta para que así sexa, fronte á “cerimonia da confusión” que buscan os partidos políticos da oposición.

Segundo Rodríguez, “os datos” desmontan as críticas dos partidos neste inicio de curso debido a que o sistema galego contará con 370 profesores máis.

Destes, 260 corresponden á Formación Profesional, cunha matriculación que medra, 70 para atención á diversidade e 40 para facer fronte ao incremento de grupos nos niveis da ESO e o Bacharelato.

Mentres tanto, asegurou, mantense o número de profesores en Educación Infantil e Primaria a pesar de que nestas etapas si que se produce unha redución importante no número de alumnos, con 2.600 escolares menos, pola caída da natalidade en Galicia.

Estes datos evidencian que “cada un pode dicir o que queira, pero a realidade pon a cada un no seu lugar”, e considerou que a interpretación que fixeron sindicatos e formacións políticas foi “precipitada” e non corresponde coa realidade porque os números reflicten que, “con menos alumnos, vai haber máis profesores”.

“É bo que a sociedade coñeza a realidade”, que son “370 profesores máis”, resolveu Román Rodríguez, quen, a pesar de presumir dos datos da súa Consellería, admitiu que “sempre hai marxe para mellorar”, aínda que, precisou, Galicia xa presenta “un dos cocientes máis baixos de España”.