A xunta birmana anuncia un indulto parcial á exlíder Aung San Suu Kyi

A xunta birmana anunciou este martes un indulto parcial á exlíder democrática Aung San Suu Kyi, detida desde o golpe de estado do 1 de febreiro de 2021 e sobre quen pesan condenas que suman ata 33 anos de cárcere.

O réxime castrense divulgou hoxe a noticia nunha concisa misiva, un día despois de anunciar a extensión do estado de emerxencia en Birmania por seis meses máis, o que anula a posibilidade de que se celebren eleccións este ano.

A notificación castrense só cita como anuladas 5 das 19 condenas que pesan contra Suu Kyi, o que confirmou tamén  unha persoa vinculada ao caso, de modo que non se espera que a nobel da Paz sexa liberada plenamente.

A decisión prodúcese días despois de que aumentasen as especulacións sobre unha posible transferencia a un arresto domiciliario da exlíder, de 78 anos e a quen só se viu unha vez en público tras o golpe.

O pasado venres, fontes próximas a Suu Kyi aseguraron que fora "reacollida" nunha data non confirmada nun edificio controlado polo réxime militar cuxa localización se descoñece, tras permanecer illada nunha prisión da capital, Naypyidó.

Suu Kyi xa pasou 15 anos baixo arresto domiciliario nunha residencia en Rangún, durante o período de mandato da anterior xunta militar (1962-2011).

O golpe de Estado de hai dous anos e medio, que derrocou o Goberno encabezado por Suu Kyi e puxo fin a unha década de transición democrática, sumiu a Birmania (Myanmar) nunha profunda crise política, social e económica e abriu unha espiral de violencia que exacerbou a guerra de guerrillas que vive o país desde hai décadas.

O Exército xustifica o golpe por unha presunta fraude durante as eleccións xerais de novembro de 2020, resultado que anularon e nas que a liga Nacional para a Democracia (NLD, polas súas siglas en inglés) de Suu Kyi arrasou, como xa fixo en 2015, co aval de observadores internacionais.

Os cambios na situación de Suu Kyi ocorren apenas un día despois de que a xunta anunciase este luns a extensión por seis meses do estado de emerxencia no país, o que impide na práctica que se celebren eleccións este ano, tal e como se esperaba.