A Xunta vai crear en Vilanova de Arousa un polo de emprendemento
A Xunta vai crear en Vilanova de Arousa un polo de emprendemento
Será o noveno que impulse o Goberno galego
O Pazo de Vista Real, no municipio pontevedrés de Vilanova de Arousa, será a sede do noveno polo de emprendemento impulsado pola Xunta de Galicia para xerar emprego, dinamizar a economía local e fixar poboación. Así o anunciou este luns a conselleira de Promoción do Emprego e Igualdade, Elena Rivo, tras manter un encontro con empresarios da comarca do Salnés.
Toda esta zona, segundo Rivo, ten "moito potencial" en ámbitos como o turismo, o comercio ou o sector primario, especialmente o mar, o que permite xerar riqueza "pegada ao territorio" a través do apoio a proxectos de emprendemento que cren "emprego de calidade".
Os oito polos activos en toda Galicia, destacou a conselleira, atenderon no último ano máis de 550 persoas, que recibiu máis de 1.700 titorías. O obxectivo destes organismos é convertelos en "verdadeiros centros de dinamización" dos territorios en que se sitúen, trasladou Elena Rivo aos empresarios, servindo como "foros de interlocución" para recoller as demandas da poboación.
