Vocación e, cando menos, 40.000 euros, ingredientes para o emprendemento hostaleiro

España é un país de bares. E o da hostalería é un dos sectores aos que se incorporan moitos emprendedores, pero abrir un negocio non é tarefa sinxela. O investimento mínimo inicial, para un local pequeno, non baixa dos 40.000 euros.

Nos últimos dous anos foron máis 1.400 os negocios de hostalaría que botaron a  andar. Hai uns cinco locais por cada mil habitantes. É un sector cun peso notable na economía do país; supón un 6 % do produto interior bruto e dálle emprego a máis dun millón 700.000 traballadores. Representa preto do 8 % do emprego. 

Detrás de cada un destes establecementos, de cada apertura, hai un emprendedor. Practicamente nove de cada dez fano por vocación, o principal ingrediente para abrir un restaurante en España.

É o caso de Antonio. Estudou Hostalería, traballou no sector e hai dez meses abriu O Trasmallo en Pontevedra, o restaurante que quixo desde neno.

"Hai que ter valor. Eu penso que hai que ter valor, porque ao final non é tan doado como parece, sabes?. Decidín arriscar porque eu son fillo de mariñeiro, familia traballadora toda a vida. E ao final tes que pedir cartos para emprender esta aventura", conta Antonio.

"Isto é montar unha empresa. É moi latoso, custoso, tedioso e as xestións duran moito tempo", explica Javier Míguez, vogal da Asociación Hostalería Compostela e xerente do grupo La Bodeguilla.

Os permisos son o principal obstáculo, segundo o sector. Tamén o acceso ao investimento, que cifran nun mínimo de 40.000 euros e vai medrando segundo o local que se queira montar. Logo está facelo rendible.

Chechu Rey é asesor gastronómico. Na súa consultora, La Isita Gastronomía atende as inquedanzas deses emprendedores gastronómicos.

 "Onde xeran as dúbidas é en como facer un plan vía, como facer unha conta de explotación, como facer a parte de xestión do restaurante ou mesmo como facer a rotación dos produtos, como son os cambios de carta", asegura.

Di que a xestión do capital nos primeiros meses é fundamental. Antonio Novas recoñece que "a medida que pasa o tempo vaste dando conta do tipo de impostos que hai, das cantidades que tes que pagar...".

Desde a asociación de hostaleiros engaden que "hai que contar coa presión fiscal, cos custos sociais dun traballador, cos salarios, coa materia prima que non deixa de encarecerse"

Din que para sobrevivir nun sector tan competitivo é vital a profesionalización, non deixar de innovar e manter a paixón.