Abren o testamento de Silvio Berlusconi ante dúas testemuñas

O testamento do exprimeiro ministro Silvio Berlusconi, un dos homes máis ricos de Italia, que faleceu o 12 de xuño, foi este mércores aberto ante dúas testemuñas en Milán antes de ser lido aos seus cinco fillos e herdeiros.

Polo momento descoñécese o contido do documento e a repartición dos seus cuantiosos bens e empresas.

As vontades do magnate, morto aos 86 anos de leucemia, foron abertas ante os avogados Luca Fossati e Carlo Rimini, as dúas testemuñas, e despois serán lidos aos fillos, segundo avanzan os medios locais.

O primeiro representa os vástagos maiores do político, Marina e Pier Silvio, do seu matrimonio coa súa primeira esposa Carla Dall'Oglio e os únicos que teñen cargos executivos no seu emporio, pois a primoxénita preside Fininvest, a sociedade de carteira familiar, e o seu irmán controla Media For Europe (MFE), a antiga Mediaset.

O letrado Rimini, por contra, representou os outros tres fillos que Berlusconi tivo coa súa segunda esposa, Veronia Lario: Barbara, Eleonora e Luigi.

Tampouco transcendeu o papel que desempeñará a que foi a súa última parella, a deputada Marta Fascina, de 53 anos, a persoa máis próxima ata o final dos seus días.

Ao longo da súa vida, o político conservador, tres veces primeiro ministro, amasou unha fortuna estimada en máis de 6.000 millóns de euros entre empresas e propiedades de todo tipo, desde cadros, vilas, barcos, xoias ou helicópteros.

A principal incógnita é como será repartida a cota do 61,21 % que posuía Berlusconi en Fininvest, o grupo familiar que engloba compañías como MFE, o banco Mediolanum, o club de fútbol Monza ou a editorial Mondadori, entre outros.

Os medios adiantan que un 40 % dese capital se repartiría en paquetes de 8 % entre os seus cinco fillos, pero faltaría por ver en quen recae o 20 % restante que daría o control da sociedade.

O conselleiro delegado de MFE, Pier Silvio, negou a venda do grupo mediático durante a presentación da próxima tempada televisiva.

"Estou orgulloso de que as empresas italianas estuden a súa expansión internacional e non de que anacos de Italia sexan conquistados por un grupo estranxeiro", argumentou tras responder cun tallante "non" a unha pregunta sobre unha posible venda do conglomerado.