Pechan todos os centros electorais en Portugal

Todos os centros electorais pecharon en Portugal. Primeiro, ás 19:00  horas, no continente e Madeira, e unha hora máis tarde no arquipélago das Azores.

A participación nas lexislativas que se celebraron este domingo era do 51,96 % ata media tarde, unha cifra que supera á que alcanzaron ao final todos os comicios parlamentarios desde 2015, cando a afluencia foi do 55,86 %, segundo o Ministerio de Administración Interna (do Interior).

Os datos (ata as 16:00 horas) son superiores ao 48,57 % rexistrado en total no 2019 e ao 51,42 % de 2022. Ao longo desta xornada, sucedéronse os chamamentos dos políticos para que a cidadanía exercese o seu dereito nun país onde a participación non adoita ser alta.

Uns 10,8 millóns de persoas estaban chamadas a votar nunhas eleccións nas que se renovan os 230 escanos do Parlamento e onde son favoritos para converterse en primeiro ministro o líder socialista, Pedro Nuno Santos, e o líder da conservadora Alianza Democrática, Luís Montenegro.

Queixas da coalición conservadora

A coalición conservadora denunciou que algunhas persoas confundiron a súa papeleta coa doutro partido con nome similar, Alternativa Democrática Nacional, e apelou á Comisión Nacional de Eleccións a pedir o "voto informado" para evitar máis erros.

Outras forzas políticas, como o Partido Socialista e Alternativa Democrática Nacional, denunciaron que, con estas queixas, Alianza Democrática (liderada polo Partido Social Demócrata) está a aproveitar para alongar a campaña electoral.

Ante a dimensión que alcanzou a polémica, a comisión electoral ordenou que os medios de comunicación "cesen calquera referencia a calquera candidatura ou partidos políticos respecto a este tema".

Sen maiorías absolutas

Malia que as sondaxes dan vantaxe á dereita, proxectan un escenario sen maiorías absolutas, polo que os pactos serán fundamentais para poder formar Goberno e a ultradereita podería ter un papel clave como terceira forza máis votada.

Estes comicios celébranse dous anos despois das anteriores, xa que a terceira lexislatura de Costa, malia que se prevía como a máis estable por ter maioría absoluta, truncouse á metade.

O primeiro ministro, no poder desde 2015, renunciou o pasado 7 de novembro tras saber que estaba a ser investigado nun caso de supostas irregularidades en negocios de litio, hidróxeno e un centro de datos.

A Fiscalía apenas divulgou información e non hai ningunha acusación formal.