Abren pistas en Manzaneda por primeira vez na temporada

Os canóns de innivación son os responsables da nevarada que permitiu abrir por primeira vez as pistas desde xaneiro do ano pasado.

"Ben. Típico día de Manzaneda: pouca neve e moita néboa. A neve está pesada, húmida e bastante rápida", sinala un esquiador.

Hai dúas pistas abertas, Xeixo A e Xeixo B, na parte superior da estación. Trescentos metros esquiables e outra zona para tirarse con zorras ou pas, o que máis aproveitaron estes estudantes de Santiago que viñeron pasar uns días na estación e aos que se unirán outros de Vigo. Para moitos é unha oportunidade única para gozar da neve, cada vez máis escasa na nosa latitude. "Moi ben, moi entretido. Había moito que non viamos a neve". "Vina unha vez de pequena, pero era moi pequena, así que ilusióname", comentan dúas rapazas.

Descontos

Para animar os esquiadores, de momento escasos, a estación rebaixou o prezo dos servizos, tanto a telecadeira coma o forfait para acceder ás pistas. A duración destas condicións, en vésperas xa da Semana Santa, dependerá, coma sempre, da meteoroloxía dos próximos días.