Abril vístese de agosto en Galicia
Esta semana rexistráronse temperaturas dez graos por riba da media
Asi e todo, o récord foi en abril de 2011, con 33.3 graos en Ourense
Molladura no río Miño, terraceo polo Parrote, parasois na area de Samil e baños de sol na Quintana. Abril vístese de agosto en Galicia con termómetros que superan os 30 graos, uns dez graos máis do habitual.
Pero por extraordinario que pareza este arranque da primavera, non son valores inéditos.
"Hai un precedente en abril de 2011, con temperaturas de máis de 32 graos, 33,3 en Ourense. Non podemos falar de récord, pero estivemos preto sobre todo no Miño de Ourense, no Baixo Miño, na comarca de Pontevedra e no Salnés", explica Alberto Romero, meteorólogo de MeteoGalicia.
O que si é propio destas datas é o cambio brusco de tempo que nos agarda a partir de mañá.
"A partir do mediodía pode chover moito en calquera punto do interior de Galicia".
Se sacaron o traxe de baño do armario déixeno xunto ao chuvasqueiro e ao abrigo, porque, despois de tanta calor, veñen as augas mil. Ao fin e ao cabo, estamos no mes de abril.
