Absoltos todos os acusados polo caso dos Papeis de Panamá

Un tribunal de Panamá absolveu aos 28 imputados polo caso Papeis de Panamá, a histórica filtración de documentos do extinto bufete panameño Mossack Fonseca, que vinculou a diversas personalidades do mundo co branqueo de capitais, informou o Órgano Xudicial.

"A xuíza Segunda Liquidadora de Causas Penais, Baloísa Marquínez (...) absolveu a 28 persoas acusadas do delito Contra a Orde Económica na modalidade de Branqueo de Capitais, nas causas acumuladas dos casos denominados 'Panama Papers' e 'Lava Jato', seguido á firma de avogados Mossack Fonseca e os seus colaboradores, así como a cidadáns de nacionalidade alemá", detallou o Órgano Xudicial nun comunicado.

Na sentenza, a xuíza sinala que as probas solicitadas nos servidores de Mossack Fonseca, con evidencias electrónicas que foron achegadas ao proceso en soporte papel, "non cumpriron coa cadea de custodia, así como os principios que rexen a proba dixital principalmente ao carecer de valores 'hash' (algoritmo matemático para transformar bloques de datos) que permitisen ter certeza da súa autenticidade e integridade".

Ademais, a xulgadora concluíu que "o resto das probas non eran suficientes e concluíntes para determinar a responsabilidade penal dos acusados, tanto dos fondos procedentes de Alemaña, así como os de Arxentina".

A xuíza Marquínez decretou a "extinción da acción penal por morte dun dos sinalados neste proceso". Trátase do avogado Ramón Fonseca Moura, xefe e cofundador da firma de avogados Mossack & Fonseca, quen faleceu o pasado 9 de maio por mor dunha pneumonía que se lle complicou, segundo dixeron a EFE os seus familiares.

De igual forma ordenou o levantamento das medidas cautelares persoais e reais que pesan contra todos os procesados, entre os cales está o avogado alemán Jürgen Mossack, socio fundador da firma xunto a Fonseca Moura. Mossack foi absolto de todo cargo.

No caso Lava Jato, o ditame indica que "non se puido determinar o ingreso de diñeiro de fontes ilícitas, procedentes de Brasil, ao sistema financeiro panameño coa finalidade de ocultar, encubrir, disimular ou axudar a eludir as consecuencias xurídicas do delito precedente".

A trama Lava Jato do Brasil acumulouse nun mesmo expediente co caso Papeis de Panamá, dada a afinidade en canto aos imputados e os feitos investigados pola fiscalía.

A investigación por este caso comezou no 2016 "por feitos noticiosos relacionados coa operación Lava Jato no Brasil, que vinculaba presuntamente a unha oficina de avogados en Panamá dedicada á creación de sociedades anónimas", como lembrou o Órgano Xudicial.

Polo seu lado, o xuízo dos Papeis de Panamá comezou o 8 de abril pasado, oito anos despois da histórica filtración de documentos do extinto bufete panameño Mossack Fonseca, que vinculou personalidades de todo o mundo co branqueo de capitais.

O xuízo polos Papeis de Panamá, concluíu o pasado 19 de abril, pero a xuíza tomou o prazo de 30 días que lle dá a lei para emitir o seu veredicto neste caso investigado polo Ministerio Público (MP, Fiscalía).

O proceso acumulado consta de 837 tomos e máis de 427.000 páxinas.