Activan controis ante a rotura dunha balsa de áridos que chegaron ao río Tambre
Activan controis ante a rotura dunha balsa de áridos que chegaron ao río Tambre
Emerxencias advertiu aos concellos afectados pola vertedura para garantir a subministración de auga á cidadanía
Imaxe do río Tambre ao seu paso por Sigüeiro (Cedida: Maricarmen Varela)
O Centro Integrado de Atención ás Emerxencias de Galicia (CIAE) informou este martes da rotura nas balsas de áridos dunha canteira en Frades, cuxa vertedura alcanzou o río Tambre polo que se activaron os mecanismos de control.
Augas de Galicia tivo notificación a pasada noite da rotura desta balsa, que chegou ao rego Gaiteiro e alcanzou o río Tambre, segundo confirmaron fontes da Consellería de Infraestruturas e Mobilidade a Europa Press.
Así, durante a mañá deste martes técnicos da entidade realizaron unha inspección oficial á empresa, confirmando a rotura da balsa e a vertedura de áridos (sen carga metálica), que neses momentos estaba controlado e que a empresa se comprometeu a arranxar ao longo do día.
Ademais, os técnicos tamén se desprazaron ata o Tambre para supervisar a afección ao río e tomaron mostras para analizar en laboratorio.
Unha vez realizada esa supervisión, ás 12:10 horas, Augas de Galicia deu aviso ao persoal do 112 Galicia para que trasladase a situación aos concellos polos que transcorre o Tambre, polas captacións de auga que se puidesen verse afectadas.
Os xestores do Centro Integrado de Atención ás Emerxencias procederon a informar os concellos de Frades, O Pino, Oroso, Santiago, Trazo, Val do Dubra, Ames, A Baña, Negreira, Brión, Noia e Outes, que realizan captacións de auga no río afectado.
Deste xeito, poderán tomar as medidas de prevención e realizar as comprobacións necesarias para garantir un seguro e correcta subministración de auga á cidadanía.
Desde os concellos afectados xa se está a informar os cidadáns, aínda que polo momento non se tomou ningún tipo de medida para restrinxir o consumo de auga.
