Actividade frenética na Limia pola colleita da pataca
Actividade frenética na Limia pola colleita da pataca
Calculan recoller uns 90 millóns de quilos, un 30 % menos ca un ano normal
A variedade agria é a máis afectada pola seca
Coma se fosen sinais de fume, o po que levantan as máquinas indícanos que é tempo de colleita na Limia. Calculan levantar da terra uns 90 millóns de quilos, entre un 20 e un 30 % menos ca un ano normal, dependendo da variedade.
Luis Saa, director técnico da IXP Pataca de Galicia: "Na kennebec a redución non é tan esaxerada, entre un 15 e un 20 % con respecto a un ano normal, pero na agria pode chegar ao 30 ou 40 %".
Tamén se segue traballando á man, como antigamente. Fano coas variedades máis delicadas, para que non se manquen e cheguen sas ao mercado. "Á variedade kennebec, a máquina provócalle marcas na pel e non valen para o mercado", explica Víctor Cabido González, agricultor de Xunqueira de Ambía.
Dos prezos non hai queixa este ano. A seca afectou en toda España e hai escaseza no mercado. Están pagando uns 38 céntimos o quilo.
José Manuel Cabido González, agricultor: "Tamén hai que ter en conta que este ano houbo moitos máis gastos que o ano pasado, así que fai falta un prezo máis elevado para cubrir gastos".
Hai menos produción pero a calidade, aclaran, é excelente. Ao non chover tampouco se estendeu o mildio, unha das pragas máis destrutivas para este produto.
