Activistas ambientais péganse ao chan nunha pista do aeroporto de Baraxas

A Garda Civil  detivo os tres activistas, dúas mulleres e un home, que provocaron a primeira hora da mañá deste venres o peche temporal dunha das pistas do aeroporto Adolfo Suárez Madrid-Baraxas ao pegar as súas mans ao pavimento para protestar contra as políticas climáticas dos principais partidos do país.

Os tres arrestados atópanse nas dependencias da Garda Civil do aeroporto e atribúenselles os delitos de desordes públicas, danos -ao romper un valo perimetral- e contra a seguridade aérea, informou a Comandancia de Madrid.

Os detidos son as dúas activistas que pegaron as súas mans ao chan da pista 32R e un home encargado de gravar a acción.

Pese ao peche temporal (dunhas tres horas) da citada pista, a actividade do tráfico aéreo no aeroporto non se detivo, xa que os voos foron desviados a outras.

A acción de Futuro Vexetal comezou ás seis da mañá, cando os tres activistas accederon á zona de pistas rompendo un valo perimetral e dous deles pegáronse ao pavimento da zona anterior á cabeceira da 32R.

Nese momento foron detectados por un traballador de Aena, que avisou a torre de control de forma inmediata, e desde alí alertouse a Garda Civil.

Futuro Vexetal, organización á que pertencen os activistas, publicou unha mensaxe nas redes sociais, onde se ve a dúas mulleres novas sentadas na pista cun cartel estendido no chan que dicía "O pobo unido funciona sen partidos", e co que instaban a loitar contra a crise climática á marxe dos partidos políticos.