Deportados a Marrocos 16 dos saharauís que solicitaron asilo en Baraxas
Deportados a Marrocos 16 dos saharauís que solicitaron asilo en Baraxas
Quedan outros 15 solicitantes de asilo nas salas do aeroporto, e algúns deles teñen programada a súa deportación para este domingo
O BNG solicita a comparecencia de Marlaska no Congreso e no Senado para dar explicacións
Ione Belarra esixiu ao Goberno que non deporte os que quedan, xa que "están nunha situación de solicitude de asilo máis que xustificada"
Bandeira do Sáhara Libre no aeroporto de Baraxas o 23 de setembro (Europa Press / Alejandro Martínez Vélez)
Interior deportou 16 dos solicitantes de asilo saharauís que estaban retidos no aeroporto de Baraxas, algúns deles desde hai un mes, unha vez que foron denegadas as súas solicitudes de protección internacional, segundo informaron a EFE fontes xurídicas.
O retorno produciuse nun voo que saíu onte de Baraxas ás 23:50 horas con destino a Marrakesh, polo que quedan 15 nas salas de asilo, dos cales algúns deles xa teñen a súa deportación programada para o vindeiro domingo 6, nun voo das mesmas características.
As fontes explicaron que, segundo relataron as familias dos afectados, dous deles foron detidos polas autoridades marroquís á súa chegada e están a ser interrogados.
Todos eles contaban con documentación que acreditaban a súa orixe saharauí -expedida pola Misión das Nacións Unidas para o Referendo do Sáhara Occidental (Minurso) ou por España a través do censo realizado en 1974- e cunha recomendación favorable de Acnur para que se autorizase a súa entrada para que puidesen completar a súa solicitude de apatridia, paralela á de protección internacional.
Nun destes informes, Acnur defendía que, "dadas as limitacións dos prazos para o procedemento de apatridia e non sendo factible que se resolva nun tempo razoable durante a estancia do solicitante no aeroporto", recomendaba autorizar a entrada do solicitante a España.
E apoiábase para iso nunha sentenza recente do Tribunal Supremo sobre a posibilidade de iniciar un procedemento de apatridia mentres o solicitante se atope nun posto fronteirizo tramitando un procedemento de protección internacional.
Fontes de Interior consultadas negaron este venres poder ofrecer datos sobre este asunto, aínda que recalcaron que cada caso "se avalía individualmente" antes de adoptar unha resolución, que se aten sempre a "os criterios e requisitos establecidos nas lexislacións nacional e internacional en materia de protección internacional".
O BNG rexistrou este venres as solicitudes de comparecencia no Congreso e no Senado do ministro do Interior, Fernando Grande-Marlaska, para que explique a devolución dos dezaseis saharauís.
A líder de Podemos, Ione Belarra, esixiu ao Goberno de Pedro Sánchez que non deporte ás persoas saharauís que seguen retidas en Baraxas xa que, segundo asegurou, "están nunha situación de solicitude de asilo máis que xustificada".
En declaracións aos medios no aeroporto de Baraxas, denunciou que a policía lle impediu novamente o acceso á sala de inadmitidos por orde do Ministerio do Interior, tras tentalo tamén sen éxito o pasado 23 de setembro.
