Afluencia masiva ás tendas en Galicia no segundo día de rebaixas

Arredor de 84 euros vai gastar cada galego nas rebaixas oficiais que comezaron o venres e van prolongarse ata o 7 de marzo. Esta fin de semana boa parte dos centros comerciais abren os dous días para aproveitar o tirón inicial e tamén para facilitar as devolucións e cambios de regalos de Nadal.

A escalada de custos leva a que se reduzan as marxes dos comerciantes nestes días e é que ofertan descontos de ata o 70 % especialmente en roupa e calzado. Os compradores queren aproveitar todo o que se poida.

A desestacionalización das rebaixas tamén inflúe, con descontos que se adiantaron a antes do día de Reis ou que se manteñen dende o black friday de novembro. Tamén se nota o efecto das compras a través da Internet, que aumentaron empuxadas pola pandemia. Con todo, sempre hai quen non quere deixar pasar as oportunidades nas tendas.

Malia os problemas económicos e sanitarios cos que comezaron as ofertas, agárdase superar os 10.000 contratos temporais de traballo ligados a este tempo de rebaixas en Galicia.