Albares, Cameron e a UE abordan en Bruxelas as cuestións máis complexas sobre Xibraltar

Os ministros de Exteriores de España e do Reino Unido, José Manuel Albares e David Cameron, xunto co máximo responsable europeo das negociacións sobre o brexit, Maros Sefcovic, reúnense este venres en Bruxelas para abordar as “cuestións máis complexas” das negociacións sobre Xibraltar.

Na reunión, prevista para as doce do mediodía, as delegacións teñen previsto poñer sobre a mesa asuntos como o uso do aeroporto e o control de aduanas, que, pola súa complexidade e as reticencias de ambas as partes, centraron as conversacións dos equipos negociadores desde hai meses.

Albares espera "espírito construtivo" para "avanzar o máis posible" sobre Xibraltar

Ambas as dúas delegacións afrontan con optimismo a reunión nun momento en que, segundo explicou Albares, o acordo sobre o encaixe de Xibraltar tras o brexit está “moi preto” e hai “unha dinámica moi positiva”.

Con todo, Albares subliñou en Onda Cero que "talvez non sexa o día final, pero case", e que, en calquera caso: “Haberá que facer despois toda unha redacción, pero xa empezamos a estar preto para poder ter un acordo sobre as liñas xerais para o mes de xullo".

Unha impresión que tamén compartiu a delegación británica é que non espera que esta reunión chegue a un acordo definitivo, pero considera que o encontro representa unha “oportunidade” de compartir puntos de vista que podería servir “como plataforma para progresar nas negociacións”.

Así, fontes de Exteriores sinalaron que nas últimas semanas se produciron “achegamentos importantes" e que os negociadores españois puideron constatar unha “actitude construtiva de todas as partes e vontade de chegar a un acordo”.

O uso do aeroporto e o control de aduanas, sobre a mesa

Na reunión, as delegacións teñen previsto poñer sobre a mesa asuntos como o uso do aeroporto e o control de aduanas que, pola súa complexidade e as reticencias de ambas as dúas partes, centraron as conversacións dos equipos negociadores desde hai meses.

Tanto España e a UE coma o Reino Unido teñen interese en que o acordo se alcance antes das eleccións europeas previstas para o próximo mes de xuño, para non atrasar o acordo varios meses, ademais de cambios na composición do Parlamento Europeo.

A iso súmase que o Reino Unido celebra eleccións en xaneiro de 2025, o que podería supoñer un cambio de Goberno e de equipo negociador e un novo atraso de meses, como xa sucedeu en 2023 cos comicios, que practicamente paralizaron o proceso desde maio ata decembro. 

Xibraltar, colonia británica desde 1713, cuxa soberanía reivindica España de maneira reiterada, quedou fóra dos acordos sobre a saída do Reino Unido da Unión Europea (UE), que se fixo efectiva o 31 de decembro de 2020, e as tres partes implicadas aínda manteñen as negociacións.