Alberto Pazos repite como portavoz do PPdeG no Hórreo

O Grupo Parlamentario Popular na Cámara galega seguirá con Alberto Pazos Couñago como portavoz e a tamén secretaria xeral do PP galego e deputada experimentada, Paula Prado, como viceportavoz primeira. A dirección do grupo completarana, como viceportavoces segunda e terceira, Cristina Sanz e María Martínez Allegue.

Dentro do prazo previsto polo regulamento do Parlamento de Galicia, tras a constitución da XII Lexislatura o pasado luns, os populares rexistran este venres o documento a través do que se conforma o grupo parlamentario e que ratifica a Pazos Couñago como portavoz.

O redondelán Alberto Pazos foi a opción elixida polo partido que lidera Alfonso Rueda para encabezar a dirección do grupo tras a marcha de Pedro Puy ao Congreso dos Deputados. Na dirección segue tamén a número dous do partido, mentres que os populares optan por renovar as viceportavocías segunda e terceira, que na última etapa ocuparon Raquel Arias e Marisol Díaz Mouteira.

Pazos, nacido en Redondela, converteuse en portavoz do grupo popular o pasado mes de setembro, en substitución de Pedro Puy, e foi deputado nas dúas últimas lexislaturas e entre os anos 2012 e 2013,

Licenciado en Dereito pola Universidade Europea de Madrid e pola Universidade Complutense é vicesecretario de Familia do PP de Galicia e entre os anos 2016 e 2022 foi secretario de Organización.

Paula Prado del Río é a actual secretaria xeral do PPdeG e foi deputada no Parlamento de Galicia nas lexislaturas VIII, IX, X e XI.

Natural de Santiago de Compostela, é licenciada e doutora en Dereito pola Universidade de Santiago de Compostela.