Alxeria descobre o maior xacemento de gas dos últimos 20 anos

Alxeria anunciou este luns o descubrimento dun novo xacemento de gas, de "entre 100 e 340.000 millóns de metros cúbicos condensados", o maior atopado en 20 anos.

"Sonatrach -empresa estatal alxerina de hidrocarburos- anuncia que evidenciou un importante potencial hidrocarburífero no xacemento de Lias Carbonate -LD2- no perímetro de explotación de Hassi R'Mel", segundo informou a compañía nun comunicado.

"Estes volumes constitúen unha das maiores revalorizacións de reservas ocorridas durante os últimos 20 anos", engadiu.

A economía alxerina depende principalmente dos hidrocarburos que suman o 96 % das súas exportacións totais- e ata este ano foi o principal provedor de gas de España e segue sendo un dos subministradores principais a Europa.

"O programa de obras de desenvolvemento está en marcha para confirmar os volumes estimados e rastrexar rapidamente unha produción de ao redor de 10 millóns de metros cúbicos por día a partir de novembro de 2022", asegurou Sonatrach.

Alxeria está na mira dos países europeos que buscan diversificar as súas fontes enerxéticas ante a dependencia do gas ruso, desde que comezou a invasión de Ucraína.