Angels Barceló, 'La revuelta', Estopa e 'La mesías', Premios Ondas 2024

As xornalistas Àngels Barceló, Isabel Jiménez e Marta Reyero; os músicos Estopa, Los Chichos e Manuel Alejandro, e os actores Mónica López e Alberto San Juan foron algúns dos galardoados cos Premios Ondas 2024, nunha edición que tamén recoñeceu a calidade dos programas La revuelta e Col·lapse e a serie La mesías.

Os especiais dos 20 anos do 11M de EITB, La Sexta e RTVE foron distinguidos como mellor programa de actualidade ou cobertura especial. El mar. El mur, de 3Cat e El asesinato de Kennedy, 60 años después compartiron o premio a mellor programación especial radiofónica e Esto no es Suecia foi nomeada como mellor serie comedia televisiva, informou a Cadena SER.

Pola súa banda, La ruina foi recoñecido como mellor podcast, nunha edición que tamén entregou un premio especial da organización ao conxunto das emisoras de radio de España e os seus profesionais na celebración do seu centenario.

Os Premios Ondas, que concede a Cadena SER a través da emisora decana, Ràdio Barcelona, entregaranse nunha gala que terá lugar o próximo 14 de novembro no Gran Teatre del Liceu, coincidindo co centenario da inauguración desta mesma emisora.