Apagamento na hostalería en protesta polo alto prezo da electricidade

Como protesta contra a suba nos prezos da enerxía, parte da hostalería protagonizou este martes un apagamento reivindicativo. Durante cinco minutos quedaron ás escuras e acenderon candeas en sinal de protesta polo prezo da enerxía.

Sete en punto da tarde. Un restaurante de Lugo acende dúas candeas e apaga a luz durante cinco minutos. O xesto repítese en moitos locais de hostalería de Galicia e de España. O dono ensina un recibo da luz de outubro do ano pasado e o de abril deste ano. Case é o triplo.

Este apagamento simbólico está convocado por Hostalería de España. A federación galega tamén se sumou. O custo da enerxía representa case un 10 % dos gastos totais dun negocio.

Malia que, polo xeral, houbo melloras na eficiencia do consumo, estas non abondan para amortecer o prezo da enerxía.

Reclamacións

Na Federación de Hostalaría o que reclaman é unha revisión no cálculo das tarifas, unha especie de estatuto semellante ao do consumidor electrointensivo.

Tamén apuntan á conveniencia de aprobar bonos eléctricos cos remanentes da covid-19 que ían dirixidos ao sector e que non chegaron a empregarse e, segundo o presidente da Federación Cheché Real, suman uns 3.000 millóns de euros.

A rebaixa dos impostos eléctricos tamén axudaría a paliar a difícil situación que atravesa o sector.