Arde unha casa en Vilagarcía que levaba anos ocupada

Estaban en plena preparación da cea de Noitevella. Lasaña, para ser máis exactos, na casa que está parede con parede.

"Entraba fume e fume na casa. Saímos á horta e vimos fume que saía, e saímos á porta e máis fume", conta Salvatore, o veciño máis próximo.

Fume e lapas que alcanzaron unha altura considerable. O lume destruíu un cuarto e uns mobles amoreados na entrada. Por sorte, non había ninguén dentro.

"Viñeron despois pola noite, preguntaron que pasara e despois entraron para sacar cousas", engade Salvatore.

Era algo que se vía vir. A veciñanza leva anos de denuncias...

"É un foco continuo de 'trapicheo' e un foco constante de conflitos, de pelexas, discusións entre eles... situacións de todo tipo".

"Sempre teñen pelexas aquí, mesmo manchas de sangue e os veciños estamos fartos".

E tamén de advertencias, polo estado da vivenda.

"É unha vivenda que está en moi mal estado, que teñen moito lizo amoreado dentro e para a instalación eléctrica, usan unha toma collida de maneira irregular".

"Sinceramente, estamos contentos porque por fin se acabou o tema".

Se se acabou ou non está por ver.

"Eu creo que non porque acabamos de baixar e a porta volve estar. Onte non estaba e volveron poñela", advirte unha veciña.

A falta de confirmación oficial, o ruxerruxe di que o incendio puido ser provocado por un deles, por desavinzas co resto do grupo.