A muller mallada polo seu fillo en Cerdedo-Cotobade está en coma inducido
A muller mallada polo seu fillo en Cerdedo-Cotobade está en coma inducido
O agresor está nunha cela de psiquiatría do hospital provincial de Pontevedra
As veciñas máis próximas a Rita viron o corpo da muller de 79 anos ensanguentado e cheo de contusións no chan do seu salón. Con elas, estaba a irmá da vítima. Aínda permanecen en estado de shock.
Tamén foron testemuñas do momento no que o fillo recoñecía os feitos. Seguen conmocionadas. Só a carteira do lugar, que tamén se chama Rita, tivo a serenidade de reaccionar chamando a Garda Civil e o 112.
Ata estes últimos tempos a relación da vítima con este fillo de 46 anos din que era excepcional. Moitos consideran que era o predilecto da nai, aínda que os últimos días algúns xa o notaron estraño.
Nesta pequena parroquia de Santa María de Sacos, en Cercedo-Cotobade, todos se coñecen e saben por familiares que á vítima se lle induciu un coma esta noite na UCI do hospital Álvaro Cunqueiro de Vigo. O prognóstico non é favorable.
Tamén segue hospitalizado Antonio, o fillo que supostamente mallou nela ata deixala case exánime. O home de corenta e seis anos está nunha cela da área de psiquiatría do hospital de Pontevedra. Cando os forenses o autoricen prestará declaración nos xulgados.
