Arden dous coches no aparcadoiro dun centro comercial de Nigrán

Dous coches arderon no aparcadoiro do centro comercial Nasas, de Nigrán. Por causas que se descoñecen, o lume orixinouse nun Citroën ZX e rapidamente propagouse ao coche que estaba estacionado ao lado.

Non houbo que lamentar danos persoais, porque non había ninguén dentro dos vehículos cando se produciu o incidente. Si que levaron un bo susto os traballadores das tendas que acababan de abrir e algúns visitantes que estaban pola zona, xa que se escoitou unha pequena explosión.

A columna de fume negra víase desde diferentes partes. Porén, a rápida intervención dos bombeiros fixo que o lume non se propagase máis.