Un detido acusado de prenderlles lume a tres coches nun aparcadoiro da Lavacolla
O lume afectou unha vivenda próxima, que tivo que ser desaloxada
Varias testemuñas din que foi un cliente molesto ao que obrigaron a pagar unha recarga tras entregar o vehículo un día despois do acordado
A policía detivo un home acusado de prenderlles lume a tres coches nun negocio de aparcadoiro e alugueiro de vehículos situado na Lavacolla, preto do aeroporto de Santiago.
Segundo varias testemuñas, un cliente comezou a discutir co dono do aparcadoiro porque non lle devolvían en man a fianza do coche alugado que acababa de entregar un día máis tarde do acordado.
Ao parecer, este cliente foi supostamente a unha gasolineira próxima, mercou combustible e volveu para prenderlle lume ao vehículo que alugara. O lume propagouse rapidamente a outros dous estacionados nas proximidades e a unha vivenda próxima. As persoas que se atopaban no interior da casa tiveron que ser desaloxadas.
Tamén está acusado de agredir varias persoas na oficina de alugueiro. Os efectivos localizaron o home nos arredores e procederon á súa detención, á que se resistiu.
A alerta saltou sobre as 20:00 horas
Tal e como informou o 112, pasaban das 20:00 horas cando un particular chamou ao servizo para alertar de que ardían varios coches nunha empresa de alugueiro situada en Sabugueira, no lugar do Noval.
Segundo a versión do alertador, foi unha acción intencionada por parte dunha persoa que entrou no establecemento.
O 112 solicitou a acción de Urxencias Sanitarias de Galicia-061, dos Bombeiros de Santiago e da Policía Nacional.
Á súa chegada, os bombeiros procederon a extinguir o incendio e a refrixerar a zona. As forzas da orde encárganse de investigar o sucedido.
