As asociacións de persoas con autismo reclaman unha maior visibilidade social
As asociacións de persoas con autismo reclaman unha maior visibilidade social
Este domingo celébrase o día mundial da concienciación sobre os trastornos do espectro autista
O día de hoxe convértese un ano máis nunha chamada á visibilidade do autismo. Baixo o lema "Chamémoslle polo seu nome", familiares e afectados reivindican a desaparición do tabú arredor destes trastornos e unha maior comprensión social.
"É a discapacidade que máis taxa de desemprego ten, por esa incomprensión e ese tabú de non querer achegarse porque son raros. E non o son, porque son normais", manifesta Mercedes Fernández, presidenta da Federación Autismo Galicia.
En Galicia hai 27.000 persoas que presentan un trastorno do espectro autista, afección con múltiples facetas que condiciona o pensamento e a relación cos demais. Un diagnóstico temperán e un apoio continuado resultan fundamentais para acadar unha vida normalizada.
"Trátase de acceder a poder vivir sós, de xeito independente, pero sempre van ter que dispor o apoio dunha persoa que lles indique como integrarse, como socializar", recoñece Mercedes Fernández.
Por iso familias e asociacións insisten. A aceptación da sociedade é fundamental.
"Simplemente que os entendan, que os comprendan e que os queiran, porque son persoas coma calquera outra", reivindica a presidenta da Federación Autismo Galicia.
