As clases suspenderanse en Galicia cando haxa aviso vermello por temporal ou laranxa por neve
A Xunta actualiza os seus protocolos de actuación ante os distintos avisos meteorolóxicos
O aviso enviarase ás familias antes das 13:00 horas do día anterior sempre e cando a alerta estea activada
O Goberno galego aprobou na súa reunión semanal deste luns unha actualización dos protocolos de actuación no ámbito educativo e deportivo ante diversos supostos de alerta meteorolóxica, que poden ser por neve, xeo, choiva ou vento.
Na comunidade quedará fixado que unha alerta vermella en terra supoñerá a suspensión automática das clases e actividades deportivas e do transporte escolar do mesmo xeito que unha laranxa por neve. Nos dous casos, os docentes non estarán obrigados a acudir ao centro educativo.
A principal novidade desta actualización con respecto á anterior é que se introducen criterios predeseñados para a adopción de medidas vinculadas a cada nivel de alerta, coa base de que son os avisos laranxas e vermellos os que poden supoñer un risco para as persoas.
Decisión dos directores e posible exclusión das cidades
En calquera nivel de alerta, se as circunstancias da localidade onde se atopa o centro supuxesen un risco detectado superior ao declarado, os directores ou directoras poderán, coa comunicación previa á dirección territorial da consellería competente en educación, adoptar decisións de suspensión da actividade docente, incluíndo as actividades que se desenvolvan no exterior ou extraescolares.
Ademais, as consellerías competentes en educación e mobilidade poderán decidir a exclusión de calquera das decisións aos centros situados no espazo urbano das sete grandes cidades cando as condicións do adverso declarado non afecten gravemente as condicións de circulación nas rúas integradas na trama urbana.
Risco de inundacións
A Xunta tamén revisou este luns as zonas de risco de inundacións, un total de 200 das que 172 se atopan en ríos e o resto en lugares costeiros, que supoñen 566 quilómetros vulnerables.
Tras esta revisión, o seguinte paso será a actualización dos mapas de risco cos datos validados este luns e, a partir de aí, sinalaranse as medidas de protección necesarias ou aumentaranse as que xa existen.
Rueda destacou que esta revisión se realiza tendo en conta os efectos do cambio climático e que as inundacións xa non se concentran especificamente no outono, senón tamén no inverno, e rexístranse "cada vez máis episodios extremos de choiva e con máis intensidade".
As accións que se determinen terán como base o parte de alerta emitido pola Axencia Estatal de Meteoroloxía (Aemet) complementado co emitido polo ente autonómico Meteogalicia, advertindo dun fenómeno adverso. A emisión deste parte prodúcese ás 11.00 horas, aínda que se monitorizará a súa evolución e se non coinciden as previsións entre partes, as medidas adaptaranse ao máis desfavorable.
