Aplican a intelixencia artificial á reciclaxe do vidro en Galicia
Mediante o cruzamento de datos en tempo real, Ecovidro prevé alcanzar o 80 % de reciclaxe do vidro en 2027, anos antes do indicado pola Unión Europea
Actualmente, cada galego recicla uns 19 quilos de vidro ao ano
Cada vez que se descarga un colector do vidro en Galicia, a empresa que o xestiona recibe os datos exactos da cantidade recollida. Cruzando esa información con outros datos cuantificables, como os movementos turísticos desa zona ou a renda media, fan unha proxección do que se pode facer para mellorar as porcentaxes. É a intelixencia artificial aplicada á reciclaxe.
Germán Fernández Freire, xerente de Ecovidro en Galicia: "Imos intentar detectar as necesidades reais de 30.000 fogares galegos de distintos municipios, nos próximos anos".
Diríxense a dous públicos ben diferenciados: por un lado, os fogares que desde a pandemia foron collendo cada vez maior peso no resultado final. E, por outro lado, a hostalería, que segue representado preto do 40 por cento de todo o vidro que se recicla.
Floren Santos, hostaleiro: "As empresas de cervexa, refrescos... xa o recollen eles. Pero nós reciclamos envases de viño, etc. Non sei a cantidade exacta, pero un colector á semana, si".
O obxectivo que se marca Ecovidro no plan estratéxico que acaba de presentar é chegar ao 8 0% na reciclaxe do vidro en 2027.
"Adiantarnos cinco anos, chegando xa ao 80 % cando o obxectivo para 2030 é do 75 %", sinala o xerente de Ecovidro.
O vidro é un dos produtos con mellores resultados nos procesos de reciclaxe, xa que permite aproveitar o cen por cento e de xeito indefinido.
.png)
