As confrarías de Lugo e de Viveiro ultiman os preparativos para unha Semana Santa multitudinaria
As confrarías de Lugo e de Viveiro ultiman os preparativos para unha Semana Santa multitudinaria
As dúas festas están declaradas de interese turístico
Viveiro prepárase para recibir decenas de miles de visitantes na súa Semana Santa. Declarada de interese turístico internacional, é unha das celebracións relixiosas máis importantes de toda Galicia.
Isabel Méndez, xerente do Centro Comercial Histórico de Viveiro: "Do xoves ao domingo, os días grandes, adoitábase cubrir o cen por cento da ocupación hoteleira, unha ocupación que se acada xa durante toda a semana".
As oito confrarías da vila mariñá ultiman os preparativos para participar nas quince procesións e mais nos actos sacramentais programados.
Portarán 45 imaxes, algunha con ata 105 levadores, coma a das Sete Palabras, que sae na Paixón, onde 68 persoas levan o Cristo da Piedade, dunha tonelada de peso.
José Luis Couceiro, Confraría do Cristo da Piedade de Viveiro: "A da Paixón é a procesión máis grande que hai aquí en Viveiro. Nela implicámonos 1.500 persoas".
Estímase que a Semana Santa de Viveiro se remonta a 800 anos atrás, en plena Idade Media. É, por tanto, a máis antiga do país.
Mari Carmen Chipe, voceira da Xunta de Confrarías de Viveiro: "En Viveiro nunca se deixou de celebrar a Semana Santa. Esa é unha particularidade esencial".
Máis modesta é a Semana Santa de Lugo, que conta con seis confrarías e mais a colaboración da Terceira Orde. En total, fanse trece procesións, entre as que destaca a da Esperanza ou a do Bo Xesús, que celebra os seus 75 anos de historia cunha exposición na catedral luguesa.
Manuel Barja, irmán maior da Confraría do Bo Xesús: "En 1949 sacou en procesión, por vez primeira, a imaxe do Bo Xesús. Con tal motivo, temos aquí unha pequena mostra coa historia da confraría".
Ramón Basanta, presidente da Xunta de Confrarías de Lugo: "Nós temos procesións todos os días dende o Venres de Dores ata o Domingo de Resurrección. Entre todas as confrarías, temos entre 2.000 e 3.000 persoas colaborando".
Dende 2018, a Semana Santa de Lugo goza do categoría de Festa de Interese Turístico de Galicia.
