As máscaras deixan de ser obrigatorias nos centros sanitarios galegos
As máscaras deixan de ser obrigatorias nos centros sanitarios galegos
O descenso de gripe, covid e VRS nas últimas semanas permitiu adoptar esta medida
A partir da terceira semana de xaneiro, as consultas por gripe en Atención Primaria descenderon un 47 por cento
O Diario Oficial de Galicia (DOG) publicou este martes a orde da Consellería de Sanidade que retira a obrigatoriedade da máscara nos centros sanitarios galegos, tras consolidarse durante semanas un descenso das infeccións por gripe, covid-19 e virus respiratorio sincitial (VRS).
A retirada desta medida ten efectos desde este mesmo martes e adóptase despois de que un informe da Dirección Xeral de Saúde Pública confirmase a consolidación, na semana do 15 ao 21 de xaneiro, da baixada das infeccións respiratorias agudas.
No que respecta á gripe, a taxa de consultas en Atención Primaria do Sergas situouse nas 67,3 por cada 100.000 habitantes, un 47 por cento menos da anterior. De feito, esta taxa chegou a superar as 200 a finais do pasado ano.
Ademais, a taxa de ingresos con gripe situouse en 6,3 por cada 100.000 habitantes na semana do 15 ao 21 de xaneiro, mentres que a positividade do virus nas probas practicadas diminuíu ata o 11,4%.
"Todos estes indicadores presentan valores inferiores aos observados nas últimas tres semanas", recalca a orde que publica o DOG.
No que respecta á infección por VRS, Saúde Pública observa tamén unha "tendencia descendente" nas consultas de menores de 2 anos por bronquiolite xa desde finais de novembro, concretamente desde a semana do 20 ao 26 dese mes.
Melloría nas últimas semanas
Na semana do 15 ao 21 de xaneiro, a taxa é de 220,3 consultas por cada 100.000 habitantes e os ingresos xa son de 6,8 por cada 100.000 en nenos de ata 2 anos e de 6,3 en pacientes de 80 anos ou máis anos. Ademais, a positividade en VRS está un 6,8 % por baixo que en datas pasadas.
Finalmente, en canto á covid-19, na terceira semana do ano as consultas en primaria xa eran inferiores ao último mes, cunha taxa de 39,1 por cada 100.000; e as hospitalizacións baixaron a 3,6 por cada 100.000.
Con estas cifras, seguindo a normativa estatal, a Xunta toma a medida dende hoxe, a máscara deixa de ser obrigatoria nos hospitais. Só o será nos servizos de urxencias, nos puntos de atención continuada e nos servizos nos que hai doentes inmunodeprimidos.
