As mulleres vítimas de violencia de xénero xa poden solicitar unha axuda de ata 800 euros mensuais

As mulleres vítimas de violencia de xénero poden solicitar desde este mércores unha axuda económica mensual da Xunta de Galicia que oscilará entre 200 e 800 euros co fin de gañar independencia económica dos seus agresores. A contía poderá recibirse nun máximo de 12 mensualidades.

O Goberno galego destina 5,4 millóns de euros na convocatoria que se publicou este martes no Diario Oficial de Galicia (DOG) e que permanecerá aberta durante todo o ano, coa intención de que as mulleres poidan acceder a ela no momento en que o necesiten.

Son potenciais beneficiarias as mulleres vítimas da violencia de xénero que cesasen a convivencia co agresor no último ano, así como as afectadas por explotación sexual ou trata con fins de explotación sexual e as vítimas de violencia vicaria. A cantidade que percibirán as mulleres depende de condicións como os seus ingresos e número de fillos.

Ademais, só poderán recibir a axuda aquelas mulleres que acrediten uns ingresos mensuais iguais ou inferiores ao dobre do Indicador Público de Renda de Efectos Múltiples (Iprem) e que non a recibiron con anterioridade.

Así mesmo, o DOG recolle dúas liñas de axuda complementarias, unha delas de pago único de case 1,7 millóns de euros. Está destinada a mulleres vítimas de violencia de xénero con dificultades para buscar traballo. Doutra banda, a Xunta destina 55.000 euros para subvencionar os pagos que lles corresponda as vítimas por resolución xudicial e que o agresor incumpra. A contía máxima subvencionable de indemnización establécese en 6.000 euros.